6. febrúar, 2010

Hjólaborgin Reykjavík

Borgarstjórn samþykkti samhljóða í vikunni hjólreiðaáætlun fyrir Reykjavík, sem ber yfirskriftina Hjólaborgin Reykjavík. Markmið skýrslunnar er að gera Reykjavík að framúrskarandi hjólaborg, þar sem fólki verður gert kleift að ferðast um borgina á hjóli á öruggan og einfaldan hátt. Þúsundir Reykvíkinga hjóla nú þegar um borgina á hverjum degi, þrátt fyrir að aðstæður séu ekki eins og best verður á kosið.

Reykjavík hefur að mínu mati margt til að bera til þess að verða góð hjólaborg. Borgin er ekki mjög þétt, sem gefur svigrúm til þess að koma upp hjólastígum, nokkuð sem gamlir miðbæir eiga víða í erfiðleikum með. Borgin er ekki mjög hæðótt, sérstaklega ekki nesið sjálft sem borgin stendur að mestu á. Þá hentar veðurfar hérna betur en margan grunar til hjólreiða. Hér verður til dæmis ekki jafn kalt og víða á meginlandi Evrópu og Norður-Ameríku, og raunar ekki jafn heitt heldur. Hvorttveggja er vont fyrir þá sem nota hjólið sem samgöngutæki til og frá vinnu.

Ávinningur borgarinnar af því að fleiri hjóli er augljós. Borg með ferðamynstur eins og Reykjavík er mjög dýr í rekstri. Hér aka langflestir einir í bílum sínum á leið til og frá vinnu, sem kostar borgina gríðarlega fjármuni í byggingu og rekstri samgöngumannvirkja. Ef aðeins 10% ferða flyttust yfir á reiðhjól, myndi draga verulega úr þessum útgjöldum. Mengun myndi að sama skapi minnka, en rannsóknir sýna að mengun í þéttbýli á Íslandi er meiri en t.d. á Írlandi, Noregi og Svíþjóð. Mestur yrði þó ávinningurinn sennilega fyrir heimilin í borginni. Með því að gera fólki kleift að fara ferða sinna á hjóli, er fólki boðið upp á hagkvæmari rekstur heimilsins. Ferðir eru næst stærsti útgjaldaliður heimilanna, stærri en matarkarfan.

Hjólreiðastígar um borgina gera fólk kleift að lækka þennan kostnað og ferðast fyrir eigin afli. Þetta kann að vera ástæða þess að í nýlegri könnun sem vitnað er í í skýrslunni segja 36% aðspurðra að aukið fé í lagningu göngu og hjólastíga sé mikilvægasta samgöngumálið.

Í Hjólaborginni Reykjavík eru einnig settar fram niðurstöður ýmissa rannsókna sem gerðar hafa verið á hagkvæmni hjólreiða. Tekin eru dæmi af því hvað myndi sparast ef 10% bílferða færðust yfir á reiðhjól. Það myndi auðvitað létta verulega á gatnakerfi borgarinnar þannig að þeir sem áfram vilja aka bílum kæmust greiðar leiðar sinnar. Eknar ferðir í borginni myndu styttast um 50 þúsund km á dag, samkvæmt þeim rannsóknum sem stuðst er við. Það myndi hafa margvísleg jákvæð áhrif, svo sem minni kostnað í viðhald, minni tíma eytt í umferðatafir og betri heilsu þeirra 10% sem  myndu færa sig yfir á hjólin, og reyndar annarra borgarbúa líka vegna minni mengunar.

Áætlunin er vitaskuld ekki formlegt skipulag. Í henni eru hinsvegar tillögur að úrbótum fyrir hjólreiðafólk, og sumar þeirra eru settar fram með myndrænum hætti eins og sést á myndinni hér til hliðar. Á henni er sýnt hvernig hjólastígurinn milli Laugadals og miðbæjarins getur litið út. Stígurinn myndi liggja frá Laugadal eftir Sundlaugavegi, yfir Kringlumýrarbrautina, eftir Borgartúninu, yfir Snorrabraut og eftir Skúlagötunni niður í miðbæ. Þúsundir Reykvíkinga vinna við þessa leið og geta nýtt sér hjólastíginn til að komast í Laugar eða miðborgina og hraðan og öruggan hátt.

3. nóvember, 2009

Græna borgin í Evrópu

Á fundi borgarstjórnar í dag flutti ég tillögu fyrir hönd meirihlutans um að Reykjavík myndi sækja um að verða „Græna borgin í Evrópu“ (European Green Capital). Tillagan var samþykkt með 14 atkvæðum af 15, fulltrúi F-listans sat hjá. Umhverfis og samgöngusvið mun nú hefja vinnu við umsóknina.
Greinargerðin með tillögunni segir allt sem segja þarf um [...]

22. október, 2009

Árekstur á hjóli

Ég lenti í minniháttar árekstri á hjólinu mínu í dag. Ég var að hjóla eftir Skúlagötunni og var á gangstéttinni, þegar útúr bílakjallara kemur bíll sem þarf að fara yfir gangstéttina til að komast út á götu. Ég var sem betur fer ekki á mikilli ferð, en ökumaðurinn var eitthvað annars hugar og sá mig [...]

29. maí, 2009

Göngugötur í miðbænum

Þegar Austurstræti var gert að umferðargötu með bílastæðum, var það vegna óska frá kaupmönnum í götunni. Þeir voru þá nokkuð margir. Í fljótu bragði man ég eftir framköllunarstofunni á horninu, Karnabæ, plötubúðinni (sem Steinar rak einhverntíma), þarna var hárgreiðslustofa, Sigfús Eymundsson og Reykjavíkurapótek. Aðeins Eymundsson er eftir. Annað húsnæði hefur verið tekið undir skemmtistaði sem [...]

20. maí, 2009

Græn skref 2,0

Á fundi borgarstjórnar í gær var samþykkt framhald Grænna skrefa í Reykjavík. Þorbjörg Helga Vigfúsdóttir formaður umhverfis og samgönguráðs mælti fyrir nýju skrefunum sem miða að því að gera borgina enn grænni og fallegri, gera fólki auðveldara að nota rafmagns- eða twinbíla, fjölga forgangsakreinum Strætó og auka endurvinnslu, svo fátt eitt sé nefnt. Þetta er [...]

6. maí, 2009

Um holt og hóla

Á morgun hefst átakið Hjólað í vinnuna, sem hefur slegið undanfarin ár. Það er full ástæða til að hvetja alla til að taka þátt í því.

Reykjavík hefur alla burði til að verða góð hjólreiðaborg. Með Grænu skrefunum var hrundið af stað nýju átaki til að bæta aðstæður hjólreiðamanna í borginni. Megnið af því sem þar [...]

18. nóvember, 2008

Græn samgöngustefna

Það er mikið fagnaðarefni að borgarstjórn skuli hafa samþykkt að vinna Græna samgöngustefnu fyrir borgina. Við hétum því í Grænu skrefunum að þetta yrði gert, undir yfirskriftinni „Reykjavíkurborg til fyrirmyndar.“
Samgöngustefna er nokkuð sem hefur ekki verið mikið í umræðunni hér, en víða í evrópu er það bundið í lög að fyrirtæki skuli hafa slíka stefnu. [...]