15. desember, 2009

Þrjár merkilegar fréttir

Þrjár merkilegar kannanir hafa ratað á mitt borð undanfarna daga. Þær eru allar um samgöngumálin í Reykjavík og fela í sér dálítil tíðindi, finnst mér. Þrennt get ég dregið sérstaklega fram:

1. Umferðin í Reykjavík gengur greiðar fyrir sig en áður, og nú í haust var fólk að meðaltali 3-4 mínútum fljótar á leið sinni úr úthverfunum að atvinnukjörnum, en á sama tíma í fyrra. Starfsmenn samgöngusviðs keyra þessar leiðir og mæla með nákvæmum mælitækjum hvernig ferðin gengur, hversu langan tíma hún tekur og svo framvegis. 3-4 mínútur hljóma kannski ekki mikið, en þegar þetta er margfaldað á alla borgarbúa verða þetta ansi margar vinnustundir.

2. Talsvert færri bílar eru á götum borgarinnar nú en áður. Sniðtalningar sýna að það hafa ekki verið færri bílar á götum borgarinnar síðan 2004. Munurinn er í raun enn meiri þegar horft er til þess að Reykvíkingum hefur fjölgað um nokkur þúsund síðan þá.

3. Ástæðan fyrir minni bílaumferð er auðvitað að mjög miklu leyti kreppan og atvinnuleysið, því færri eru hreinlega á leiðinni í vinnuna á morgnana. En það dugir ekki sem skýring. Því af þeim sem eru að keyra til vinnu á morgnana, eru færri einir í bíl en áður. Nú eru „aðeins“ 71% borgarbúa einir í bíl á leið til vinnu, en þessi tala var 76% í fyrra. Þá fóru líka aðeins 9% gangandi eða hjólandi til vinnu, en nú velja 14% þá ferðamáta. Það munar svo sannarlega um minna.

Fleiri tölur styðja þá tilfinningu sem við sem störfum í þessum málum höfum haft; ferðamátar okkar eru að verða fjölbreyttari en þeir hafa verið. Fleiri kjósa að skera niður í ferðakostnaði sínum, enda eru samgöngur stærri hluti af útgjöldum heimilanna en matarinnkaup. Borgin hefur þá skyldu að gera borgina þannig úr garði að þeir sem ekki hafa fjárráð til að reka tvo bíla á heimili, geti komist á milli staða á fljótlegan og öruggan hátt. Það gerum við með því að leggja góða göngu- og hjólreiðastíga, reka almenningssamgöngur og reyna að hanna borgina þannig að fólk komist auðveldlega á milli staða.

Í nýrri könnun sem Bjarni Reynarsson gerði, sögðu 49% íbúa höfuðborgarsvæðisins að „mikilvægasta aðgerð samgönguyfirvalda á höfuðborgarsvæðinu“ væri að „styrkja almenningssamgöngur“. 36% sögðu að mikilvægast væri að „setja aukið fé í lagningu göngu- og hjólreiðastíga“. 13% sögðu að mikilvægast væri að „einbeita sér að þeim framkvæmdum við stofnbrautakerfið sem gefa mesta arðsemi.“

Borgaryfirvöld þurfa auðvitað að horfa á allar þessar niðurstöður og læra af þeim. Að mínu mati er lærdómurinn sá að við eigum að auðvelda fólki að ferðast um borgina á þann hátt sem það kýs. Ef borgin er skynsamlega skipulögð og hverfin örugg fyrir börnin okkar, munu fleiri og fleiri kjósa að ganga og hjóla styttri vegalengdir, námsmenn munu velja að taka strætó í skóla (og sumir halda því áfram eftir skólagöngu) og þeir sem keyra komast þá greiðar um, þurfa að verja minni tíma í umferðarteppum og samgöngumannvirkin okkar nýtast betur.

7. desember, 2009

Daufur blár punktur

Afi vinar míns var að deyja. Góður maður, afburðamaður í ýmsum skilningi, en aðallega í mínum huga afi vinar míns. Við vorum að velta fyrir okkur lífinu og tilverunni af þessu tilefni og fórum vafalaust með almælt sannindi um mikilvægi þess að njóta lífsins.
Fjölmargir hafa orðað slíka hugsun vel og óþarfi að fara að vitna [...]

3. desember, 2009

Vonarstrætið

Ólíkt hafast þær að Hönnurnar; Jóhanna Sigurðardóttir og Hanna Birna Kristjánsdóttir. Þessar ágætu konur sem starfa hvor sínum megin við Vonarstrætið standa báðar frammi fyrir erfiðum aðstæðum í þeim stofnunum sem þær stýra. En þær bregðast ólíkt við þeim.
Í dag lagði borgarstjórn Reykjavíkur fram fjárhagsáætlun fyrir næsta ár. Þar er forgangsraðað í þágu velferðarmála og [...]

16. nóvember, 2009

Af skatta-útreikningum Gríms Atlasonar

Fyrir nokkrum dögum skrifaði Grímur Atlason pistil um skattamál á bloggsíðu sína undir fyrirsögninni: “Af meintri brjálsemi ríkisstjórnarinnar”. Pistillinn fór sem eldur í sinu um netið, enda töldu vinstrimenn að Grímur hefði sýnt fram á að breytingarnar væru ákaflega hófsamar. Hann hélt því nánar tiltekið fram að áhrifin væru eftirfarandi:
“Þeir sem eru með 150.000 kr. [...]

3. nóvember, 2009

Græna borgin í Evrópu

Á fundi borgarstjórnar í dag flutti ég tillögu fyrir hönd meirihlutans um að Reykjavík myndi sækja um að verða „Græna borgin í Evrópu“ (European Green Capital). Tillagan var samþykkt með 14 atkvæðum af 15, fulltrúi F-listans sat hjá. Umhverfis og samgöngusvið mun nú hefja vinnu við umsóknina.
Greinargerðin með tillögunni segir allt sem segja þarf um [...]

22. október, 2009

Árekstur á hjóli

Ég lenti í minniháttar árekstri á hjólinu mínu í dag. Ég var að hjóla eftir Skúlagötunni og var á gangstéttinni, þegar útúr bílakjallara kemur bíll sem þarf að fara yfir gangstéttina til að komast út á götu. Ég var sem betur fer ekki á mikilli ferð, en ökumaðurinn var eitthvað annars hugar og sá mig [...]

16. október, 2009

Gott íslenskt ákvæði

Talið er að íslenska ákvæðið svokallaða hafi og muni skila Íslendingum 15 milljörðum króna  á skuldbindartíma Kyoto samningsins. Það væri þó lítils virði ef við værum í leiðinni að skemma hnöttinn. En þannig er það ekki. Talið er að vegna íslenska ákvæðisins hafi losun gróðurhúsalofttegunda í heiminum minnkað um 5-14 milljón tonn, miðað við það [...]

15. október, 2009

Framtíð Hreins Lofts

Fyrir nokkrum árum vakti Reykjavíkurborg athygli á þeirri hættu sem steðjar að hreinu lofti í borginni með herferð sem bar yfirskriftina: Framtíð Hreins Lofts er í þínum höndum. Markmiðið með þessu var að vekja Reykvíkinga til umhugsunar um að hreina loftið, sem við höfum alist upp við í borginni, er hreint ekki sjálfsagt. Það er [...]

10. október, 2009

Fríða Kahlo

Ég fór í Þjóðleikhúsið á dögunum og sá sýninguna um Fríðu Kahlo; Frida…viva la vida. Sýningin hefur verið talsvert í umræðunni og greinilegt var að hún lenti í hringiðu leikhúspólitíkur, en mér skilst að stjórnmálin í borginni séu leikur einn við hlið hennar.

Ekki kann ég neitt að gagnrýna leikhús … en ég veit hvað mér [...]

7. október, 2009

Afsökunarkrafa vegna afsökunarbeiðni

Jóhanna Sigurðardóttir baðst afsökunar í ræðustóli Alþingis í gær. Hún baðst að vísu ekki afsökunar á því að hafa viljað samþykkja Icesave „samninginn“ sem Svavar Gestsson kom með heim. Hún baðst heldur ekki afsökunar á því að verja nú hundruðum milljóna króna í að komast í Evrópusambandið (sem þjóðin vill ekki fara í), þegar blóðugur [...]