Ekið á barn
Enn ein fréttin barst í gær um að bíl hefði verið ekið á barn í Reykjavík. Ekkert þekki ég til málsins en vona að meiðsli séu ekki alvarleg og sendi öllum hlutaðeigandi hlýjar hugsanir.
Verstu fréttir sem foreldrar geta fengið er að eitthvað hafi komið fyrir barnið þeirra. Það er þessvegna hörmulegt til þess að vita að í hverri viku verður slys á gangandi vegfarenda í Reykjavík og í hverjum mánuði verður alvarlegt slys á gangandi vegfarenda. Þetta er allt of mikið, og allir eru sammála um það.
Einfaldasta leiðin til að fækka þessum slysum er að hægja á umferð í hverfum borgarinnar og draga úr henni. Það er hinsvegar ótrúlegt hvað sumir eru tregir í taumi þegar kemur að því að tryggja öryggi barnanna okkar í hverfunum. Sumir ökumenn bregðast illa við þegar settar eru fram tillögur um að lækka hraða inni í hverfum. En það er einmitt hraðinn sem skiptir mestu máli.

Eins og sést á þessu súluriti eru sáralitlar líkur á því að gangandi vegfarandi láti lífið ef bíllinn sem ekur á hann er á 32 km/klst eða minna. (20 mph=32 km/klst). En ef bíllinn ekur á 48 km/klst aukast líkurnar hinsvegar verulega, og hinn gangandi vegfarandi á ekki nema um helmingslíkur á að lifa slíkan árekstur af (30 mph=48 km/klst). Þetta er einmitt ástæðan fyrir því að borgarstjórn samþykkti einróma á dögunum að lækka hraða í hverfum borgarinnar. (Pistil minn um það má sjá hér.) Umhverfis- og samgönguráð tók þá tillögu fyrir á þriðjudaginn og samgönguskrifstofa borgarinnar vinnur nú að útfærslum á henni.
