Landspítalinn
Þrennt sem er mikilvægt að sé á hreinu í umræðunni um Landspítalann:
* Landspítalinn þarf að fá nýja byggingu og á að fá hana.
* Deiliskipulagið sem nú er í kynningu er hinsvegar fráleitt.
* Eina vitið er að byggja fallega nýja álmu norðan gömlu Hringbrautar, eins og ég hef til dæmis fjallað um hér. Þannig höldum við gömlu Hringbrautinni, höldum ásýndinni að Landspítalabyggingu Guðjóns Samúelssonar, nýtum þær byggingar sem fyrir eru og spörum pening.
Í þeim plönum sem nú liggja fyrir stendur hinsvegar til að byggja meira en 200 þúsund fermetra til viðbótar við þá 73 þúsund fermetra sem fyrir eru. Samtals verða byggingar á reitnum um 290 þúsund fermetrar þegar allt er komið. (Smáralindin er 62.730 fermetrar, Borgarspítalinn er 30 þúsund fermetrar og Harpan er 28 þúsund fermetrar).
Bílastæðahúsin á reitnum ein og sér eru jafn stór og Borgarspítalinn og Harpan til samans.
Það sem flækir þessa umræðu er að meirihlutinn í borgarstjórn og aðrir talsmenn verkefnisins eru farnir að tala nær eingöngu um 1. áfanga verkefnisins, og segja að þetta sé nú ekkert mikið byggingarmagn. „Í fyrsta áfanga er áformað að byggja 76 þúsund fermetra á árunum 2013 til 2018 fyrir spítalastarfsemi.“ Takið eftir orðunum fyrir spítalastarfsemi. Það er hinsvegar talsverð blekking fólgin í því að tala um 76 þúsund fermetra í fyrsta áfanga. Á heimasíðu verkefnisins má finna Excel skjal með helstu staðreyndum (ekki öllum þó). Þar kemur eftirfarandi fram:
| Fyrsti áfangi | Síðari áfangi | |||||
| 20 | Viðbót við K byggingu | 750 | ||||
| 21 | Meðferðarkjarni / Legudeildir | 58,500 | 10,000 | |||
| 22 | Rannsóknarhús | 14,000 | 4,500 | |||
| 23 | Háskóli Íslands, Keldur | 10,000 | 4,000 | |||
| 24 | Sjúkrahótel | 4,300 | 2,500 | |||
| 25 | Vörumóttaka / sorpmiðstöð | 3,000 | ||||
| 26 | Tengigangar neðanjarðar | 1,900 | 600 | |||
| 27 | Tengibrýr, 2. hæð eða ofar | 850 | ||||
| 28 | Göngudeild / legudeidir | 20,000 | ||||
| 29 | Háskóli Íslands / sjúkrahús | 11,000 | ||||
| 30 | Tæknirými bílageymslu vestur | 1,500 | ||||
| 30a | Atvinnuhús vestan bílag. húss vestur | 2,750 | ||||
| 31 | Tæknirými í bílageymslu austur | 1,500 | ||||
| Bílageymslur ofanjarðar | 14,000 | 5,500 | ||||
| Bílageymslur neðanjarðar | 22,900 | 30,500 | ||||
| SAMTALS | 134,450 | 90,100 | ||||
Það er því mjög villandi, svo ekki sé meira sagt, að segja að fyrsti áfangi sé 76 þúsund fermetrar, jafnvel þótt bætt sé við „fyrir spítalastarfsemi“. Fyrsti áfangi er samkvæmt þessu 134,450 fermetrar, til við bótar við þá 73 þúsund fermetra sem fyrir eru. Hvers vegna er villandi upplýsingum sem þessum haldið fram?
Þar að auki er það augljóst að ef við ætlum okkur að byggja eingöngu þennan fyrsta áfanga, þá er þetta skipulag náttúrulega algjörlega galið. Ef okkur vantar bara 76 þúsund fermetra í spítalastarfsemi, hvers vegna þá að hlamma þunglamalegri byggingu niður beint ofan á gömlu Hringbrautina og framfyrir gömlu Landspítalabyggingu Guðjóns Samúelssonar? Fylgum heldur hugmyndum sem birtast í þessari grein (http://www.gislimarteinn.is/?p=1135) og hefjum undirbúning að hóflegri uppbyggingu innan núverandi lóðar norðan við gömlu Hringbrautina. Það þarf ekki að taka langan tíma.
Ég má til með að vekja athygli á góðum skrifum Hilmars Þórs Björnssonar um málið á undanförnum dögum. Síðan hans er hér: http://blog.pressan.is/arkitektur/. Við Hilmar erum ekki sammála um allt, en hann færir góð rök fyrir sínu máli og er opinn fyrir skoðunum annarra. Sjálfur tel ég að hófleg uppbygging sé rétt staðsett við Hringbrautina, og hef minni áhyggjur en Hilmar af umferðarmálum, þótt vissulega þurfi að leysa ákveðin mál. Ég held það eigi við um Hilmar líka, að fyrst þegar þetta skipulag kom fram, taldi ég að það væri vel heppnað ef ákveðnir þættir yrðu lagaðir. Að mínu mati hefur skipulagið hinsvegar versnað í því ferli sem síðan hefur verið í gangi, auk þess sem augu mín hafa opnast fyrir ýmsum afgerandi göllum við þetta skipulag eftir því sem ég hef legið lengur yfir því.
Frestur fólks til að gera athugasemdir við deiliskipulagið sem nú er í auglýsingu rennur út þriðjudaginn 4. sept. Athugasemdir má senda á netfangið og ég hvet alla þá sem hafa skoðanir á þessum áformum til að senda stutta línu.